mardi 2 décembre 2014 | By: bacchus

كان بودي


          كان بودِّي

أو حين يغني رسم الحرف عن ريشة اللون.. كم أحببت هذا النصّ (باخوس) 


نصّ للمبدع: علي سعيدان

كان بودِّي
نسارّك بكلام
ما بين همس و حن
و تعبير عن وجدان
و ما يصطخب في كيان
من نَوْ و من مُوجات
و من أرياح شلوق
في شهر أيِنَّار
***
كان بودِّي
تكوني في احلامي ندِّي
و ما نخجل من بياض الشيب
و ما نوطـِّي من غبطة النظرات
و ما نخبِّي مالمحبة احساس
و ما نرقب عيون النَّاس
يتلفتو قدى شورنا
و يتعجبو في العشق عند مرورنا
و يتساءلو على اسرارنا
و يتهامسو و يتناقلو في اخبارنا
***
كان بودِّي
نغرس سباسب جـِلـْمة
زنبق و ورد و نسري
تعطـّر سرير منامك
و نقدّل هناشر مكثر
حنة لزين أقدامك
و نجمع نجوم الليل
و بالصبر ننظمهالك
من سمح القلايد جوهر
و سخاب من عنبر بلاد بعيدة
***
كان بودِّي
مِنَ مْشَاعِرِي نسدِّيلك
حولي بغزل قوافي
و جدّادْ قسيم عوارم
مرقوم وشمه خيلي
و نقولـَّه يا حُولي:
وقـِّي على محبوبي
نا نخاف من شمس الضَّحَى تصهدها
و هبوب الشهيلي الحارقة تلفحها
و من نسمتك يا بحري مهما حنـَّت
نغتاظ و تِنْفَتَحْ الأجراح
***
و تهزني لرياح
فوق السحاب الطاير
مع بسمتك
مع حيرتك
و مع الحنين الهادر
و مع اليأس اللي فيك و في
مع نور الرجا في الفجر
مع ظلمة ليلي الهجر
مع نغمة الحن في همساتك
مع هدير الخوف في جواجي
مع ساعات الصمت بيني و بينك
مع ترتيل الشعر في ما تكتب
مع احساس التعب بالوحدة
مع دكـّات الغضب تتفجر
مع كل نبضة حب في شراييني
نرتاحلك،
و نحس نظراتك،
بدفئها تغطيني
و بطيف الأمل يرجع،
يرجع من بعد العناء
من عذب العيون الساحرة يرويني
***
و في لحظة يرجع لعقلي الشاهد
نلقى العمر اتعدّى
مهما العمر اتعدى
و ليَّام مني صدّت
لا يضيع مني ودّي
و نبوحلك بأشعاري
و نسارك بأحلى معاني العشق
الحاء حياتي حيات
و الباء بالبدء مع طيفك ضوت و بدات
و مهما الموجة العاتية تتعلـّى
لا يضيع منـِّي ودِّي
إنك في يوم،
في حلم،
أو في علم...
تكوني أحلى ندّي

هذا النص بقراءة الشاعر نفسه مدّنا به مشكورا الصديق الشاعر الطيّب بوعلاق. يقول المتنبي لا تبادل بشعر بعد شاعره قد أُفسد القول حتى أُحمد الصمم. الموسيقى للفنان جمال قلّة

https://www.youtube.com/watch?v=-9-eVl_UgFI

4 commentaires:

taieb bouallegue a dit…

إختيار رائع صديقي جمال ألف شكر دمت

bacchus a dit…

دمت شاعرنا الفنان صديقي الغالي

Braham Fathi a dit…

هدية لكل من هو أخضر تخطى الستين

bacchus a dit…

هههههه حلوة نقشة من تخطى الستين تاكد الامر ساري بداية من الخمسين

Enregistrer un commentaire